Акыркы макалалар

Лейлек районунда экинчи жолу өзгөчө кырдаал жарыяланды

Лейлек районунда экинчи жолу өзгөчө кырдаал жарыяланды

Жаратылыш кырсыгы болгон аймакта аскер кызматкерлери, куткаруучулар иштеп жатат.

Баткен облусунун Лейлек районунда өзгөчө кырдаал жарыяланды. Бул тууралуу ӨКМдин маалымат кызматы кабарлады.

Билдирүүгө ылайык, 9-июнь күнү саат 16:15тер чамасында катуу жааган жамгырдан улам Лейлек, Катраң, Сумбула, Тогуз-Булак жана Ак-Суу айыл аймактарында сел жүргөн. Анын кесепетинен бир бала бакча, 13 үй, 67 жергиликтүү тургундун чарбасы, жолдор жана арыктар суу алдында калган.

Жаратылыш кырсыгынан жабыркагандарга аскерлер, куткаруучулар жардам берүүдө. Окуя болгон аймакка өзгөчө кырдаалдар министри Нурболот Мирзахмедов да барган. Учурда айрым жашоочуларды тез арада чатырларга көчүрүү пландалууда.

Эске сала кетсек, ушул жылдын 13-майында аталган райондо нөшөрлөп жааган жамгырдан улам суунун деңгээли көтөрүлүп, үйлөрдү суу каптаган болчу. Ошондо да өзгөчө кырдаал жарыяланган.

Түп нускага шилтеме : sputnik.kg