Акыркы макалалар

Бишкекте каракчылык менен жан баккан топ кармалды

Бишкекте каракчылык менен жан баккан топ кармалды

Кылмышка шектүүлөрдүн жанынан эки таяк, бычак жана уюлдук телефондор табылган

Бишкекте эркек кишини күч колдонуп унаага ичинен бычак такап акча талап кылган деген шек менен үч адам кармалды. Бул туурасында Бишкек шаардык милициясынан билдиришти.

Маалыматка ылайык, алар кечээ, 9-мартта, жабырлануучунун төрт миң сом акчасын карактап кеткен.

"Каракчылык боюнча 102 номерине маалымат түшөрү менен мобилдик батальондун экипажы жөнөп кетти. Жабырлануучунун арызынын негизинде кылмышкерлердин сары изине түшүп үч кишини кармады", — дешти милициядан.

Кармалгандар 21 жаштагы Э.А., 34 жаштагы К.Э., жана 33 жаштагы Р.Н атуу жарандар экени аныкталды. Тинтүү учурунда алардын жанынан эки таяк, бычак жана уюлдук телефондор табылган.

Бул факты боюнча Кылмыш жаза кодексинин 168-беренеси (каракчылык) боюнча кылмыш иши козголду. Борбор калаанын Ленин райондук ички иштер башкармалыгынын кызматкерлери аталган кылмышка шерик болгондорду жана кармалгандардын башка дагы кылмыштарга тиешеси бар-жогун тактап жатат.

Өткөн айда дагы Бишкекте жети дүкөнгө кол салган деген шек менен мурда соттолуп чыккан үч киши кармалган.

Түп нускага шилтеме : sputnik.kg