Акыркы макалалар

Ысык-Көл: Элеттеги коомдук мончо

Ысык-Көл: Элеттеги коомдук мончо

Түп районунун Тасма айылындагы мончо үч жылдан бери иштебей турган. Аны айыл тургуну сатып алып, оңдоп түзөөдөн өткөргөндөн кийин мончо элге кызмат көрсөтө баштады.

Тасма айылындагы коомдук мочно совет доорунун аяк чендеринде курулган. Андан бери мончонун ээси төрт жолу алмашкан. Быйыл аны айыл тургуну Сагынай Осмонакунова үй-бүлөсү менен сатып алып, учурда мончо кайрадан иштей баштады.

Мончо от жаккан жерден, кийинчү жана жуунчу бөлмөлөрдөн турат. Осмонакунованын айтымында, мончону оңдоп түзөө үчүн 40 миң сомдой акча каражаты кеткен.

“Эскини оңдогондо көбүрөөк акча талап кылат экен. Мештери жыртылып жараксыз нерселери көп экен. Тактайларынын баары чирип, цементтердин баары ураптыр. […] Аларды кайрадан тазалоодо көп эле кыйынчылыктар болду”, — деди мончо ээси.

Ал кеткен каражатын актайт деп эсептейт. Болгону учурда айыл ичинде тургундарга мончо тууралуу маалымат жетпей жатат деген ойдо Осмонакунова.

“Азыр жаңы иштетип жатабыз. Элдерге кулактандыруу жетпей жатат окшойт. Бирок түшкөндөр жакшы маанай менен кетип жатышат. [Оңдоого кеткен чыгашаны] актайт деп ойлойбуз, дароо актабайт да, ага да убакыт керек”, — дейт ал.

Алдыда Осмонакунова мончонун кире беришиндеги чоң бөлмөнү душ кылып, ага улай дагы бир бөлмөгө компьютердик оюндарды ачуу ниетинде.

Тасма айылынын тургундары мончонун жаңыланып кызмат көрсөтө баштаганына оң көз карашта. Мончонун кызматынан пайдалануу 80 сом турат. Бирок айрымдарын мончого түшүү баасы канааттандырбайт.

“Мурда үстүнөн тамчы тамчу. Шыбын жылуулашыптыр, кафель чаптаптыр, кире беришти цементешиптир. Акчасы кымбатыраак. Ичи ошончолук жакшы болгону менен 50 сомдон деле кылса болмок. Көп киши келмек”, — дейт айылдын жашоочусу Назира Адырбекова.

Коомдук мончо аптасына эки күн иштейт — ишемби күндөрү аялдарга, жекшембиде болсо эркектерге ачык.

Түп нускага шилтеме : ky.kloop.kg