Акыркы макалалар

Селсаяктар үчүн Токмоктун мэриясы туруктуу түнөк жай уюштурат

Селсаяктар үчүн Токмоктун мэриясы туруктуу түнөк жай уюштурат

Кыш мезгилинде Токмок шаарында селсаяктар үчүн түнөк жай ачылган. Шаардык муниципалитет аны туруктуу иштетүүнү пландап жатат.

Sputnik. "Мэриянын пландарында селсаяктар үчүн жылдын 4 мезгили бою иштеген түнөк жай ачууну пландап жатат", — деп билдирди Sputnik сайтына Токмок шаарынын мэринин кеңешчиси Марат Абдраев.

Суук түшкөндөн тартып Өзгөчө кырдаалдар министрлигинин шаардык куткаруу кызматынын мурдагы имаратына 20 кишиге ылайыкташкан түнөк жай ачылган. Учурда ал жакта 19 селсаяк жашап жатат.

Имараттын ичине жергиликтүү бюджеттин эсебинен оңдоо иштери жасалып, ысык суу киргизилип, жууна турган жайлары жасалып, бөлмөлөрдө тиричилик буюмдары коюлган.

"Быйыл тамак-ашка бюджеттен каражат каралган эмес. Андыктан, биз ыктыярчыларды чакырдык. Чиркөөдөн ысык тамак алып келишти. Бул жакка чач тарач, психолог жана дарыгерлерин алып келгендер, отун, көмүр алып бергендер да болду", — деди ал.

Түнөк жайда кезек менен социалдык кызматкерлер иштеп жатат. Алар саат 10:00дөн 17:00гө чейин, кезектеги кызматкер 17:00дөн 22:00гө чейин иштейт. Түнкүсүн күзөтүү кызматынын кишилери карайт.

Туруктуу иштетүүгө аракеттер көрүлүп жаткан түнөк жайдын максаты – селсаяктарды реаблитациялоо. Аларга жеке документтерин даярдоодо жардам берилет жана дарылануусуна шарт түзүп берүү да каралууда.

Мэриянын өкүлүнүн айтымында, тамак-аш менен камсыз кылууда маселе жок. Түнөк жайда жашап аткан аялдар ал жакты тазалап, тамак жасашат.

"Токмок шаарынын 2015-жылкы планы бекитиле элек, андыктан түнөк жайды кармап турууга каражат табуу караштырылууда", — дейт Абдраев.

Аталган түнөк жай Токмок шаарындагы "Төмөнкү промзона" кичирайонундагы Северцев көчөсүндө жайгашкан.

Түп нускага шилтеме : sputnik.kg